ന്യൂയോർക് :ഇറാഖ് തലസ്ഥാനമായ ബാഗ്ദാദിൽ വെച്ച് അമേരിക്കൻ ഫ്രീലാൻസ് മാധ്യമപ്രവർത്തക ഷെല്ലി കിറ്റിൽസണെ അജ്ഞാത സംഘം തട്ടിക്കൊണ്ടുപോയി. കഴിഞ്ഞ ചൊവ്വാഴ്ചയാണ് സംഭവം നടന്നത്.
തട്ടിക്കൊണ്ടുപോകാൻ ഉപയോഗിച്ച ഒരു വാഹനം ഇറാഖ് സുരക്ഷാ സേന പിടിച്ചെടുക്കുകയും ഒരാളെ അറസ്റ്റ് ചെയ്യുകയും ചെയ്തു. പിടിയിലായ വ്യക്തിക്ക് ഇറാൻ അനുകൂല സായുധ ഗ്രൂപ്പായ കതൈബ് ഹിസ്ബുള്ളയുമായി ബന്ധമുണ്ടെന്ന് റിപ്പോർട്ടുകൾ സൂചിപ്പിക്കുന്നു.
ഷെല്ലിക്കെതിരെ സായുധ ഗ്രൂപ്പുകളുടെ ഭീഷണി നിലനിന്നിരുന്നതായും ഇറാഖ് വിടാൻ അമേരിക്കൻ അധികൃതർ പലതവണ മുന്നറിയിപ്പ് നൽകിയിരുന്നതായും റിപ്പോർട്ടുകളുണ്ട്. എന്നാൽ ഈ മുന്നറിയിപ്പുകൾ തെറ്റായ വിവരങ്ങളാണെന്ന് കരുതി അവർ ഇറാഖിൽ തുടരുകയായിരുന്നു.
ഷെല്ലിയെ സുരക്ഷിതമായി മോചിപ്പിക്കാൻ എഫ്.ബി.ഐ (FBI), സ്റ്റേറ്റ് ഡിപ്പാർട്ട്മെന്റ് എന്നിവർ ഇറാഖ് സർക്കാരുമായി ചേർന്ന് അന്വേഷണം നടത്തിവരികയാണ്.
മിഡിൽ ഈസ്റ്റ് കേന്ദ്രീകരിച്ച് ദീർഘകാലമായി റിപ്പോർട്ടിംഗ് നടത്തുന്ന ഷെല്ലി കിറ്റിൽസൺ, അൽ-മോണിറ്റർ (Al-Monitor) ഉൾപ്പെടെയുള്ള അന്താരാഷ്ട്ര മാധ്യമങ്ങൾക്ക് വേണ്ടിയാണ് പ്രവർത്തിക്കുന്നത്.
