തങ്ങളുടെ മൂന്നാമത്തെ പ്രൊഡക്ട് പുറത്തിറക്കാന്‍ ഒരുങ്ങി നത്തിങ് ഇയര്‍. നത്തിങിന്റെ ജനപ്രിയ വയര്‍ലെസ് സ്റ്റീരിയോ ഇയര്‍ഫോണുകളായ നത്തിങ് ഇയര്‍ -1 ന്റെ പിന്‍ഗാമിയായ നത്തിങ് ഇയര്‍ 2 ആണ് കമ്പനി പുറത്തിറങ്ങാന്‍ ഒരുങ്ങുന്നത്. മാര്‍ച്ച് 22 ന് നത്തിങ് ഇയര്‍-2 പുറത്തിറക്കുമെന്ന് ഔദ്യോഗിക വെബ്സൈറ്റിലൂടെ നത്തിങ് അറിയിച്ചു. നത്തിങിന്റെ ഗ്ലോബല്‍ പ്രൊഡക്റ്റ് മാര്‍ക്കറ്റിങ് മേധാവി മേഘ വിശ്വനാഥ് നത്തിങ് ഇയര്‍ 2 TWS പുറത്തിറക്കുന്ന വിവരം ട്വീറ്റ് ചെയ്തിട്ടുണ്ട്. മാര്‍ച്ച് 22 വൈകീട്ട് 8.30 നായിരിക്കും അവതരണം. തത്സമയ സ്ട്രീമിങായി പരിപാടി കാണാം.
നത്തിങ് ഇയര്‍-1, നത്തിങ് ഫോണ്‍-1 എന്നീ രണ്ട് ഉല്പന്നങ്ങള്‍ മാത്രമാണ് നത്തിങിന്റേതായി വിപണിയിലുള്ളത്. വണ്‍ പ്ലസ് എന്ന ബ്രാന്‍ഡിന്റെ സഹസ്ഥാപകനായ കാള്‍പെയ് ആണ് നത്തിങ് എന്ന പുതിയ കമ്പനി തുടങ്ങിയത്. പുതുമയുള്ള രൂപകല്പനയില്‍ പുറത്തിറങ്ങിയ കമ്പനിയുടെ രണ്ട് ഉല്പന്നങ്ങള്‍ക്കും വലിയ സ്വീകാര്യത നേടിയെടുക്കാന്‍ സാധിച്ചിരുന്നു. നത്തിങ് ഫോണ്‍-1 ന്റെ പിന്‍ഗാമിയായ നത്തിങ് ഫോണ്‍-2 താമസിയാതെ പുറത്തിങ്ങുമെന്ന് ബാര്‍സലോണയില്‍ നടന്ന ഈ വര്‍ഷത്തെ മൊബൈല്‍ വേള്‍ഡ് കോണ്‍ഗ്രസില്‍ വെച്ച് കാള്‍ പെയ് പ്രഖ്യാപിച്ചിരുന്നു. എന്നാല്‍ ഫോണ്‍ പുറത്തിറക്കുന്ന തീയ്യതി വ്യക്തമല്ല.
