യുപിഐ പേയ്‌മെന്റുകൾ നടത്തുന്ന ഉപയോക്താക്കൾക്ക് ഇഎംഐ ഓപ്ഷൻ പ്രഖ്യാപിച്ച് സ്വകാര്യ ബാങ്കായ ഐസിഐസിഐ. ക്യുആർ കോഡുകൾ സ്‌കാൻ ചെയ്ത് നടത്തുന്ന യുപിഐ പേയ്മെന്റുകൾക്കാണ് ഇഎംഐ സേവനം പ്രഖ്യാപിച്ചിരിക്കുന്നത്. ബാങ്കിന്റെ 'Buy Now, Pay Later' ഓപ്ഷൻ യോഗ്യത നേടിയ ഉപയോക്താക്കൾക്കാകും PayLater EMI ഓപ്ഷൻ തിരഞ്ഞെടുക്കാൻ പറ്റുക. ഒരു ക്രെഡിറ്റ് കാർഡ് എങ്ങനെ പ്രവർത്തിക്കുന്നുവോ, അതേ രീതിയിലാകും ഈ സേവനവും, എന്നാൽ ഇവിടെ കാർഡുകൾ സൈ്വപ്പ് ചെയ്യുന്നതിനു പകരം ക്യൂആർ കോഡ് സ്‌കാൻ ചെയ്യുന്നു.
അധിക പേപ്പർ വർക്കുകൾ ഇല്ലാതെ തന്നെ വലിയ വാങ്ങലുകൾ നടത്താൻ സേവനം ഉപയോക്താക്കളെ പ്രാപ്തമാക്കും. മർച്ചന്റ് ക്യുആർ കോഡ് സ്‌കാൻ ചെയ്ത് ഇഎംഐ ഓപ്ഷൻ വഴി സാധനങ്ങളോ സേവനങ്ങളോ വേഗത്തിൽ സ്വന്തമാക്കാൻ ഉപയോക്താക്കൾക്കു പുതിയ സംവിധാനത്തിലൂടെ സാധിക്കുമെന്നു അധികൃതർ വ്യക്തമാക്കി. ഗാഡ്ജെറ്റുകൾ, ഭക്ഷണം, വസ്ത്രങ്ങൾ, പാദരക്ഷകൾ, യാത്രകൾ, ഹോട്ടൽ റിസർവേഷനുകൾ എന്നിവയുൾപ്പെടെ വിപുലമായ ശ്രേണിയിലുള്ള വാങ്ങലുകൾക്ക് ഈ സേവനം ലഭ്യമാണ്.
10,000 രൂപയിൽ കൂടുതൽ മൂല്യമുള്ള ഇടപാടുകൾ മാത്രമാകും ഇത്തരത്തിൽ ഇഎംഐ ഓപ്ഷനിലേയ്ക്കു മാറ്റാൻ സാധിക്കുക. 3, 6, 9 എന്നിങ്ങനെ മൂന്ന് ഇഎംഐ കാലാവധികളാകും ഉപയോക്താക്കൾക്കു തുടക്കത്തിൽ ലഭിക്കുക. അധികം വൈകാതെ ഓൺലൈൻ വാങ്ങലുകൾക്കും ഈ സേവനം പ്രവർത്തനക്ഷമമാകുമെന്ന് അടുത്തവൃത്തങ്ങൾ വ്യക്തമാക്കി.
അടുത്തകാലത്ത് യുപിഐ പേയ്‌മെന്റുകൾക്ക് ലഭിച്ച ജനസ്വീകാര്യതയും, ബാങ്കിന്റെ PayLater സംവിധാനത്തിൽ യുപിഐ പ്രയോഗിക്കാൻ ഉപയോക്താക്കൾ കാണിക്കുന്ന ഉത്സാഹവുമാണ് പുതിയ സേവനത്തിനു വഴിവച്ചതെന്ന് ഐസിഐസിഐ ബാങ്കിന്റെ ഡിജിറ്റൽ ചാനൽസ് ആൻഡ് പാർടനർഷിപ്പ് തലവൻ ബിജിത്ത് ഭാസ്‌ക്കർ വ്യക്തമാക്കി. വ്യാപാര കേന്ദ്രങ്ങളുടെ ക്യൂആർ കോഡുകൾ സ്‌കാൻ ചെയ്ത് വലിയ പേയ്‌മെന്റുകൾ ചെറിയ ഇഎംഐകൾക്കി ഉപയോക്താക്കൾക്കു തന്നെ മാറ്റമെന്നും അദ്ദേഹം പറഞ്ഞു.
PayLater -ൽ EMI സൗകര്യം എങ്ങനെ ഉപയോഗിക്കാം
നിങ്ങൾക്ക് ആവശ്യമായ സാധാനങ്ങളോ, സേവനങ്ങളോ ഒരു റീട്ടെയിലർ ഷോപ്പിൽ നിന്നു വാങ്ങുക.
ഇടപാട് പൂർത്തിയാക്കാൻ iMobile Pay ആപ്പിലെ 'Scan any QR' ഓപ്ഷൻ ക്ലിക്ക് ചെയ്യുക.
ഇടപാട് മൂല്യം 10,000 രൂപയിൽ കൂടുതലാണെങ്കിൽ PayLater EMI ഓപ്ഷൻ ദൃശ്യമാകും.
3, 6 അല്ലെങ്കിൽ 9 ആവശ്യമായ ഇഎംഐ കാലാവധി തെരഞ്ഞെടുക്കുക. (പലിശ, സർവീസ് ചാർജ് പോലുള്ള വിവരങ്ങളും ഇതോ വിൻഡോയിൽ കാണാനാകും).
തുടർന്ന് നിങ്ങളുടെ പിൻ നമ്പർ നൽകി ഇടപാട് പൂർത്തീകരിക്കാം.
