ആഗോള വിപണിയിലെ ഉണർവിനെ തുടർന്ന് ഇന്ത്യൻ ഓഹരി വിപണിയിലും ഉണർവ്. നിഫ്റ്റി ആഴ്ചയിലെ അവസാന ട്രേഡിംഗ് ദിനത്തിൽ 17,867.5 എന്ന ലെവലിൽ പോസിറ്റീവ് ആയി വ്യാപാരം അവസാനിപ്പിച്ചു. തുടർച്ചയായ ആറാം മാസവും യുഎസ് ഉപഭോക്തൃ വില സൂചികയെ അടിസ്ഥാനമാക്കിയുള്ള പണപ്പെരുപ്പം കുറഞ്ഞതാണ് വിപണിയെ പോസിറ്റീവ് ആക്കിയത്. വാൾ സ്ട്രീറ്റ് സൂചികകൾ നേട്ടത്തിൽ ആയിരുന്നു. ഒറ്റരാത്രിയിലെ വ്യാപാരത്തിൽ നാസ്ഡാക്ക് കോമ്പോസിറ്റ് 0.64 ശതമാനവും ഡൗ ജോൺസ് ഇൻഡസ്ട്രിയൽ ആവറേജ് 0.64 ശതമാനവും ഉയർന്നു. എസ് ആന്റ് പി 500 0.34 ശതമാനമാണ് ഉയർന്നത്.
രാവിലെ 10:40 ന്, നിഫ്റ്റി 50 40.9 പോയിന്റ് (0.23 ശതമാനം) ഇടിഞ്ഞ് 17,817.3 ലാണ് വ്യാപാരം നടന്നത്. മുൻനിര സൂചികകളുമായി താരതമ്യപ്പെടുത്തുമ്പോൾ വിപണി സൂചികകളിൽ സമ്മിശ്ര പ്രകടനമായിരുന്നു. തുടക്കത്തിൽ നിഫ്റ്റി മിഡ് ക്യാപ് സൂചിക 0.56 ശതമാനവും സ്മോൾ ക്യാപ് സൂചിക 0.07 ശതമാനവും ഇടിഞ്ഞു. ജനുവരി 12ലെ കണക്കുകൾ പ്രകാരം വിദേശ സ്ഥാപന നിക്ഷേപകർ 1,662.63 കോടി രൂപയുടെ ഓഹരികൾ വിറ്റു. ആഭ്യന്തര സ്ഥാപന നിക്ഷേപകർ 2,127.65 കോടി രൂപയുടെ ഓഹരികൾ വാങ്ങിയ സ്ഥാനത്താണിത്.
