വാർത്ത: രാജു മൈലപ്രാ
ടാമ്പാ : വേള്‍ഡ് മലയാളി കൗണ്‍സില്‍ ഫ്‌ളോറിഡ പ്രൈം പ്രോവിന്‍സിന്റെ ആഭിമുഖ്യത്തില്‍ നടത്തപ്പെട്ട ക്രിസ്മസ് - പുതുവത്സരാഘോഷം വൈവിധ്യമാര്‍ന്ന പരിപാടികള്‍ കൊണ്ട് വര്‍ണ്ണാഭമായി.
'Winter Wonderland gala' എന്ന ടാഗ് ലൈനില്‍ നടത്തപ്പെട്ട ആഘോഷപരിപാടികള്‍, ഡിസംബര്‍ 28-ന് ക്രിസ്മസ് രാവുകളെ അനുസ്മരിക്കുംവിധം അതിമനോഹരമായി അലങ്കരിച്ച ടാമ്പാ സെന്റ് ജോസഫ് സീറോ മലബാര്‍ കാത്തലിക് ചര്‍ച്ച് ഓഡിറ്റോറിയത്തിലാണ് അരങ്ങേറിയത്.
ടാമ്പാ മലയാളികളുടെ നിറസാന്നിധ്യത്തില്‍ മികവുറ്റ കലാപ്രതിഭകള്‍ വിവിധ കലാപരിപാടികള്‍ അവതരിപ്പിച്ചു. വീണാതന്ത്രികളില്‍ (harp) മിസ് ഷെറിന്‍ ഉതിര്‍ത്ത സംഗീതവീചികള്‍ അലയടിച്ച സാന്ദ്രമായ അന്തരീക്ഷത്തില്‍ പരിപാടികള്‍ക്ക് തുടക്കമായി.
പ്രോവിന്‍സ് പ്രസിഡന്റ് ബ്ലെസന്‍ മണ്ണിലിന്റെ സ്വാഗത പ്രസംഗത്തിനുശേഷം മിഖേല ജോസഫ് അമേരിക്കന്‍ ദേശീയ ഗാനവും, സ്മിതാ ദീപക് ഇന്ത്യന്‍ ദേശീയ ഗാനവും ആലപിച്ചു.
വിശിഷ്ടാതിഥിയായി സന്നിഹിതയായിരുന്ന ഹില്‍സ്ബറോ കൗണ്ടി കോര്‍ട്ട് ജഡ്ജ് ബഹുമാനപ്പെട്ട മോണിക്കാ സ്‌കോട്ടിനെ, ചെയര്‍മാന്‍ ഡോ. അംബ്രോസ് ചാഴിക്കാട്ട് പൊന്നാട അണിയിച്ച് സ്വീകരിച്ചു.
വേള്‍ഡ് മലയാളി കൗണ്‍സില്‍ ഗ്ലോബല്‍ പ്രസിഡന്റ് തോമസ് മൊട്ടയ്ക്കല്‍, ബിസിനസ് ഫോറം വൈസ് ചെയര്‍മാന്‍ സുരേന്ദ്രന്‍ കാനാട്ട്, ടൂറിസം ഫോറം ചെയര്‍മാന്‍ സുജിത് ശ്രീനിവാസന്‍, വള്ളുവനാട് ബിസിനസ് ഫോറം ചെയര്‍മാന്‍ ജോണ്‍ ആലുക്കാ, ഗ്ലോബല്‍ ജോയിന്റ് ട്രഷറര്‍ ഡോ. ഷിബു സാമുവേല്‍, ഡാളസ് ചെയര്‍മാന്‍ ജോ സാമുവേല്‍, ബിസിനസ് ഫോറം സെക്രട്ടറി സുഖേഷ് ഗോവിന്ദന്‍, അമേരിക്കന്‍ റീജിയന്‍ പ്രസിഡന്റ് ജിനേഷ് തമ്പി എന്നിവര്‍ ആശംസകള്‍ അര്‍പ്പിച്ചു.
നിവേദ്യ ഷിബു, അനുപമ റോബിന്‍, സിനി സാജു, ആഗ്നാ മാത്യു, ടിയാ ബാബു എന്നിവര്‍ അവതരിപ്പിച്ച താളനിബുഡ ചടുലനൃത്തങ്ങളും, ആന്റണി ചേലക്കാട്ട്, ചിബി ചെരുവില്‍ കിഴക്കേതില്‍, ശശ്രീതാ സാജു എന്നിവര്‍ ആലപിച്ച ശ്രുതി മധുരമായ ഗാനങ്ങളും ആഘോഷങ്ങള്‍ക്ക് മിഴിവേകി.
ജെയ്‌നി ജോണ്‍ കോര്‍ഡിനേറ്റ് ചെയ്ത 'വിന്‍ഡോ വണ്ടര്‍ലാന്‍ഡ് ഫാഷന്‍ ഷോ' അവതരണത്തിലും ആവിഷ്‌കാരത്തിലും ഉന്നത നിലവാരം പുലര്‍ത്തി കാണികളുടെ മുക്തകണ്ഠ പ്രശംസ നേടി.
വര്‍ണ്ണാഭമായ ഈ ആഘോഷപരിപാടികള്‍ക്ക് എവിന്‍ ദീപക് (ഡിജിറ്റല്‍ മാര്‍ക്കറ്റിംഗ്), ബേബി സെബാസ്റ്റ്യന്‍, ദീപക് സതീഷ്, സിദ്ധാര്‍ത്ഥ് നായര്‍ (ജസ്‌ട്രേഷന്‍ ഡെസ്‌ക്) എന്നിവര്‍ പ്രവര്‍ത്തിച്ചു.
കാരളിന്‍ ജോണ്‍സണ്‍ കോര്‍ഡിനേറ്റ് ചെയ്ത ഈ പരിപാടികളില്‍ രമ്യാ തരുണ്‍, അഞ്ജലി നായര്‍, റോസ് രാജന്‍ എന്നിവര്‍ മാസ്റ്റര്‍ ഓഫ് സെറിമണീസ് ആയി പ്രവര്‍ത്തിച്ചു.
ക്രിസ്മസ് -ന്യൂഇയര്‍ ആഘോഷങ്ങള്‍ ഓര്‍മ്മയിലെന്നും സൂക്ഷിക്കുവാന്‍, സാന്തയുമൊത്ത് ചിത്രം എടുക്കുവാനുള്ള ഫോട്ടോ ബൂത്ത് സൗകര്യവും ഒരുക്കിയിരുന്നു.
സാഖ് കുരുവിള നിയന്ത്രിച്ച യൂത്ത് വോളണ്ടിയേഴ്‌സും, സാനാ ജോസഫിന്റെ നേതൃത്വത്തില്‍ പ്രവര്‍ത്തിച്ച ഇരുപത്തിയാറ് കൗമാരക്കാരായ വോളണ്ടിയേവ്‌സിന്റെ സേവനവും പ്രത്യേകം പ്രശംസയര്‍ഹിക്കുന്നു.
സിബി ചരുവില്‍ കിഴക്കേതില്‍ നന്ദി പ്രകാശിപ്പിച്ചു. വിഭവസമൃദ്ധമായ ഡിന്നറോടുകൂടി പരിപാടികള്‍ സമാപിച്ചു.
